Xamenei ABŞ ilə imzalanan memorandumla bağlı xalqa müraciət edib

İranın ali rəhbəri Müctəba Xamenei ABŞ ilə imzalanmış memorandumla bağlı ölkə ictimaiyyətinə müraciət edib.

Xamenei müraciətini “X” sosial şəbəkəsində yayımlayıb.

Xamenei bildirib ki, memorandumla bağlı ilkin mövqeyi fərqli olsa da, Prezident Məsud Pezeşkianın və Ali Milli Təhlükəsizlik Şurasının üzvlərinin İran xalqının və “Müqavimət Cəbhəsi”nin maraqlarını qorumaq öhdəliyi götürdüklərini bəyan etməsindən sonra sənədə razılıq verib.

Onun sözlərinə görə, ABŞ Prezidenti Donald Tramp və İran Prezidenti Məsud Pezeşkian arasında saziş artıq imzalanıb. Xamenei qeyd edib ki, razılaşmanın əldə olunması istiqamətində aparılan danışıqlarda İran rəsmiləri mühüm səylər göstəriblər.

Ali rəhbər əlavə edib ki, Pezeşkian ABŞ tərəfinin əlavə tələblər irəli sürəcəyi təqdirdə onlara boyun əyməyəcəyini bildirib. Xameneinin sözlərinə görə, bundan sonra memorandumda nəzərdə tutulan öhdəliklərin icrasının nəticələri izlənəcək.

İyunun 18-də imzalanan memorandum Vaşinqton və Tehran arasında yekun razılaşmanın hazırlanması məqsədilə 60 günlük danışıqlar prosesinin başlanmasını nəzərdə tutur. Sənəddə tərəflər arasında hərbi əməliyyatların dayandırılması, gərginliyin azaldılması, İranın nüvə proqramı üzrə müzakirələrin aparılması və digər məsələlər üzrə danışıqların davam etdirilməsi ilə bağlı müddəalar yer alıb.