Texasda iki milyon arı daşıyan yük maşını aşıb

ABŞ-ın Texas ştatında təxminən iki milyon arı daşıyan yük maşınının aşması nəticəsində arılar pətəklərdən ətrafa yayılıb.

Yerlı KBTX telekanalının məlumatına görə, hadisə bazar günü Texasın cənub-şərqində yerləşən kənd ərazilərindən birində baş verib. Arı pətəkləri ilə yüklənmiş yük maşınının aşması nəticəsində təxminən iki milyon arı sərbəst qalıb.

Məlumata əsasən, yerli arıçılar hadisə yerinə gələrək təcili yardım və digər xidmət orqanlarına dəstək göstərib, ərazinin təhlükəsizliyinin təmin olunmasına və yolun pətək qalıqlarından təmizlənməsinə kömək ediblər.

Hadisənin baş verdiyi Orange County sakinlərinə ehtiyat tədbiri olaraq bir müddət evdə qalmaları tövsiyə olunub.

Yerli KOGT radiostansiyasının məlumatına görə, yük maşınının sürücüsü döngədə idarəetməni itirib və nəqliyyat vasitəsi aşıb. Qəza nəticəsində sürücü xəsarət almayıb.

Hadisənin nəticələrinin aradan qaldırılması və arıların yenidən pətəklərə toplanması istiqamətində işlər davam etdirilir.

Aytac Zeynalova