“Apple” VK tətbiqlərinin “App Store”dan silinməsini sanksiyalarla izah edib

ABŞ-nin Apple şirkəti VKontakte (VK) qrupuna məxsus tətbiqlərin "App Store" onlayn mağazasından silinməsinin sanksiya tələblərinə riayət edilməsi ilə bağlı olduğunu bildirib.

"Apple"ın nümayəndələri "Ostorojno, novosti" teleqram kanalına bildiriblər ki, "VK" tətbiqləri qüvvədə olan sanksiya qaydalarına uyğun olaraq platformadan çıxarılıb. Şirkət fəaliyyət göstərdiyi ölkələrin qanunvericiliyinə əməl etdiyini qeyd etsə də, söhbətin hansı konkret sanksiyalardan getdiyini açıqlamayıb.

"VK" şirkətinin özü ABŞ və Avropa İttifaqının birbaşa sanksiya siyahılarında yer almır.

İyunun 25-də "Apple" "App Store"dan "VK Video", "VK Messenger", "VK Music" və "Dzen" daxil olmaqla "VK" qrupuna məxsus 18 tətbiqi silib.

Rusiyanın Rəqəmsal İnkişaf, Rabitə və Kütləvi Kommunikasiyalar Nazirliyi isə bu addımı siyasi motivli adlandırıb.