Xameneinin üç oğlu vida mərasimində - Yenilənib

İranın mərhum Ali Lideri Ayətullah Əli Xameneinin Tehranda keçirilən vida mərasimində onun ailə üzvləri də iştirak ediblər.

İran dövlət televiziyasının yaydığı görüntülərdə Xameneinin oğulları Mustafa, Məsud və Meysəmin cənazə üzərində keçirilən mərasimdə yer aldığı əks olunub. İRİB-in məlumatına görə, Xameneinin Hoda və Büşra adlı iki qızı olub. Məlumata əsasən, Büşra atası ilə birlikdə həlak olub.

Səudiyyə Ərəbistanının “Əl-Ərəbiyyə” telekanalının məlumatına görə, hazırkı Ali Lider Müctəba Xamenei vida mərasimində iştirak etməyib. Məlumata əsasən, onun təhlükəsizlik səbəbindən ictimaiyyət qarşısına çıxmadığı bildirilir.

***

İranın sabiq Ali Lideri ayətullah Əli Xamenei ilə vida mərasimi davam edir.

Tehranda keçirilən vida mərasimində İran rəsmiləri, din xadimləri və minlərlə insan iştirak edib.

Vida mərasimləri iyulun 3-də başlayıb təkcə İranda deyil, İraqın Nəcəf və Kərbəla şəhərlərində də davam etdiriləcək.

Rəsmilərin məlumatına görə, Əli Xameneinin cənazəsi iyulun 8-də İraqa aparılacaq, iyulun 9-da isə vəsiyyətinə uyğun olaraq İranın Məşhəd şəhərində dəfn ediləcək.

86 yaşlı Əli Xamenei fevralın 28-də Tehranda həyata keçirilən aviazərbə nəticəsində həlak olub.