Lavrov və Rubio Manilada Ukrayna müharibəsini müzakirə ediblər

Rusiyanın xarici işlər naziri Sergey Lavrov və ABŞ dövlət katibi Marko Rubio cümə axşamı Manilada yarım saatdan çox davam edən danışıqlar aparıblar, Rusiya mediası bildirib.
Məlumata görə, görüş planlaşdırılmış cədvəl üzrə keçirilib və əsas diqqət Ukraynadakı müharibənin mümkün həlli yollarına yönəldilib.

Lavrov görüş ərəfəsində Moskvanın Vaşinqtonun Alyaskada təqdim edilən təkliflərdən imtina etmədiyi qənaətində olduğunu demişdi.

Rubio isə rusiyalı həmkarı ilə Ukraynadakı müharibəni müzakirə edəcəyini və ABŞ-ın münaqişənin başa çatdırılmasında konstruktiv rol oynamağa çalışdığını bildirmişdi.
Bu, Lavrov və Rubio arasında dördüncü üzbəüz görüş olub. Onlar sonuncu dəfə ötən ilin sentyabrında Nyu-Yorkda görüşmüşdülər.

Danışıqlarda Lavrovu xarici işlər nazirinin müavini Andrey Rudenko, Xarici Siyasətin Planlaşdırılması Departamentinin direktoru Aleksey Drobinin və Rusiyanın ASEAN yanında daimi nümayəndəsi Yevgeni Zaqaynov müşayiət ediblər.

Rubionun nümayəndə heyətinə isə dövlət katibinin siyasi məsələlər üzrə müavini Alison Huker və ABŞ prezidentinin xüsusi elçisi Serjio Qor daxil olub.

Gülnar Nazimqızı