Tbilisi küçələri su altında qalıb - Video

Şənbə gecəsi Tbilisidə yağan leysan yağışı paytaxtın bir sıra rayonlarında daşqınlara və digər fəsadlara səbəb olub.

“Novosti-Qruziya”nın məlumatına görə, güclü yağış nəticəsində küçələri, zirzəmiləri və bir neçə metro stansiyasını su basıb. Kommunal qəza halları qeydə alınıb, bəzi ərazilərdə elektrik enerjisinin verilişində fasilələr yaranıb. Bir sıra yollarda nəqliyyatın hərəkəti çətinləşib.

Yağış-kanalizasiya sistemlərinin güclü yağıntının öhdəsindən gələ bilməməsi nəticəsində bir neçə küçəni su basıb.

Turistlərin çox ziyarət etdiyi Leqvtahevi dərəsində güclü su axını palçıq selinə çevrilib.

Tbilisi meriyasının məlumatına görə, ən mürəkkəb vəziyyət Saburtalo rayonunda yaranıb. Tamarashvili prospektində suyun səviyyəsi yüksəlib.

Çikovani küçəsində qaz kəməri zədələnib. Qəza ilə əlaqədar yaxınlıqdakı çoxmənzilli binanın sakinləri təxliyə edilib.

Didube-Nadzaladebi rayonunda da bir sıra insidentlər qeydə alınıb. Sanerqe küçəsində baş verən sürüşmə nəticəsində yaşayış evinin divarı zədələnib. Hadisə zamanı xəsarət alan olmayıb.

Gecə saatlarında fəsadların aradan qaldırılmasına fövqəladə hallar xidmətləri, patrul polisi və bələdiyyə xidmətlərinin əməkdaşları cəlb olunub.

Meriyanın məlumatına görə, Tbilisinin bütün 10 rayonunda küçələrin təmizlənməsi və bərpa işləri aparılıb.