Ermənistan Aİ və AİB arasında seçimlə bağlı referendum keçirə bilər

Ermənistanda yaxın gələcəkdə Avropa İttifaqına (Aİ) və ya Avrasiya İqtisadi Birliyinə (AİB) üzvlüklə bağlı referendum keçirilsə, bu, Rusiya üçün məyusedici nəticə ilə başa çata bilər. Bunu Ermənistan Təhlükəsizlik Şurasının katibi Alen Simonyan bildirib.

O deyib ki, ölkə belə bir məsələ gündəmə gəldikdə öz seçimini edəcək.

“Əgər yaxın gələcəkdə Ermənistanda Aİ və ya AİB-ə üzvlüklə bağlı referendum keçirilsəydi, Rusiya Ermənistan əhalisinin reaksiyasından çox kədərlənərdi”, – Simonyan deyib.

O, hazırda Ermənistanın Aİ-yə üzvlüyü ilə bağlı konkret addımlar atmadığını və referendumun keçirilməsi üçün məsələnin hələ formalaşmadığını bildirib.

Simonyanın sözlərinə görə, vətəndaş təşəbbüsü nəticəsində Aİ-yə üzvlük prosesinin başlanması ilə bağlı qanun layihəsi qəbul edilib, lakin hazırda üzvlüklə bağlı rəsmi proses yoxdur.

Eyni zamanda, Simonyan Ermənistanın AİB-dən çıxmaq niyyətində olmadığını vurğulayıb.

“Biz AİB-dən çıxmaq istəmirik və çıxmayacağıq”, – o bildirib.

Ermənistanın Aİ ilə yaxınlaşması son illərdə sürətlənib. Baş nazir Nikol Paşinyan daha əvvəl bildirib ki, Aİ-yə üzvlüklə bağlı referendum yalnız Ermənistan rəsmi şəkildə üzvlük üçün müraciət etdikdən və bununla bağlı institusional proses başladıqdan sonra keçirilə bilər.

Simonyan həmçinin Rusiya Təhlükəsizlik Şurasının sədr müavini Dmitri Medvedevin Ermənistanla bağlı açıqlamalarını “yersiz və həddindən artıq aqressiv” adlandırıb.

“Biz Rusiyaya qarşı heç bir şəkildə hərəkət etməyəcəyik və siyasi və ya iqtisadi mənada müharibə aparmayacağıq. İstərdim ki, rusiyalı tərəfdaşlarımız mövcud vəziyyətə anlayışla yanaşsınlar”, – Simonyan deyib.

Gülnar Nazimqızı