Putin və Si Cinpin arasında Bişkekdə görüş başlayıb

Rusiya Prezidenti Vladimir Putin və Çin Prezidenti Si Cinpin arasında Şanxay Əməkdaşlıq Təşkilatının (ŞƏT) sammiti çərçivəsində Bişkekdə ikitərəfli görüş başlayıb.

Görüşdə Rusiya tərəfini xarici işlər naziri Sergey Lavrov, Baş nazirin müavini Aleksey Overçuk, prezident administrasiyası rəhbərinin müavini Maksim Oreşkin, Kremlin sözçüsü Dmitri Peskov, prezidentin köməkçisi Yuri Uşakov, eləcə də bir sıra nazirlər və dövlət qurumlarının rəhbərləri təmsil edir.

Putin görüşün əvvəlində Rusiya ilə Çin arasında əməkdaşlığın bütün sahələrdə uğurla inkişaf etdiyini bildirib.

Rusiya prezidenti həmçinin qeyd edib ki, Çin bunu məqsədəuyğun hesab edərsə, Moskva iki ölkə arasında vizasız rejimin daimi əsasda tətbiqi ilə bağlı Pekinlə əməkdaşlığa hazırdır.

Görüşdə ikitərəfli münasibətlərin, iqtisadi əməkdaşlığın və beynəlxalq gündəmin əsas məsələlərinin müzakirə olunacağı gözlənilir. Rusiya tərəfi daha əvvəl Putin və Si Cinpin arasında görüşdə “Sibirin Gücü-2” qaz kəməri layihəsinin də müzakirə ediləcəyini açıqlamışdı.

Gülnar Nazimqızı