Ermənistanın sabiq müdafiə naziri Seyran Ohanyanın işi məhkəməyə göndərilir

Ermənistanda sabiq müdafiə naziri Seyran Ohanyan barəsində vəzifə səlahiyyətlərindən sui-istifadə faktı üzrə başlanmış cinayət işinin ilkin istintaqı yekunlaşıb və onun barəsində ictimai cinayət təqibinə başlanılıb.

Ermənistan İstintaq Komitəsinin Baş Hərbi İstintaq İdarəsinin məlumatına görə, Ohanyan hərbi qulluqçulara mənzil paylanması prosesinə qanunsuz müdaxilə edib. Müəyyən edilib ki, o, 2008-ci ildə mənzil komissiyasına qohumluq əlaqəsində olduğu Müdafiə Nazirliyinin əməkdaşına növbədənkənar mənzil verilməsi barədə tapşırıq verib.

Nəticədə həmin şəxsin ailəsinə elə həmin gün İrəvanda üçotaqlı mənzil ayrılıb və bu addım illərlə növbədə duran digər hərbçilərin hüquqlarının pozulmasına səbəb olub. Cinayət işi ittiham aktı ilə birlikdə təsdiqlənməsi və məhkəməyə göndərilməsi üçün nəzarətçi prokurora təqdim edilib.

N.Təbrizli