Qaqik Tsarukyanın həbs müddəti 2 ay uzadılıb

İrəvanın Birinci İnstansiya Məhkəməsi “Çiçəklənən Ermənistan” partiyasının sədri Qaqik Tsarukyanın həbs müddətini daha iki ay uzadıb.

“Armenpress” xəbər verir ki, bunu Tsarukyanın vəkili Emin Xaçatryan jurnalistlərə açıqlamasında deyib.

“Məhkəmə Qaqik Tsarukyanın həbs müddətini daha iki ay uzadıb. Biz bu qərardan Apellyasiya Məhkəməsinə şikayət edəcəyik”, - vəkil bildirib.

Tsarukyan iyulun 7-də saxlanılıb. Onun barəsində külli miqdarda dələduzluq və çirkli pulların yuyulması ittihamları irəli sürülüb. Daha sonra ona qarşı vergidən yayınma ittihamı da irəli sürülüb.

İstintaq çərçivəsində Tsarukyanın yaşayış evində, həmçinin onun və ailəsinin əlaqəli olduğu bir sıra şirkət və digər obyektlərdə axtarışlar aparılıb.