“Starlink” peyklərinin sayı 11,1 mini keçib

ABŞ-nin “SpaceX” şirkətinin “Starlink” layihəsi çərçivəsində Yer orbitində fəaliyyət göstərən peyklərin sayı 11,1 mini ötüb.Bu barədə “SpaceX”in məlumatlarında bildirilir.

Qeyd olunur ki, ötən bazar günü növbəti peyk qrupunun orbitə buraxılmasından sonra “Starlink”in aktiv peyklərinin ümumi sayı 11 133-ə çatıb.

Ümumilikdə, “SpaceX” 2019-cu ilin mayından etibarən “Starlink” layihəsi çərçivəsində 12,9 mindən çox internet peykini orbitə çıxarıb. Peyklərin bir qismi texniki səbəblərdən fəaliyyətini dayandırıb və ya orbitdən çıxarılıb.

Cari ilin əvvəlindən isə şirkət 80 “Falcon 9” raketinin köməyi ilə təxminən 2 min “Starlink” peykini orbitə göndərib.

“SpaceX” gələcəkdə qlobal internet şəbəkəsini tam formalaşdırmaq məqsədilə orbital qruplaşmadakı aktiv peyklərin sayını 12 minə çatdırmağı planlaşdırır. Bu şəbəkənin dünyanın istənilən yerində istifadəçiləri genişzolaqlı internetlə təmin etməsi nəzərdə tutulur. Layihəyə ümumi investisiyanın təxminən 10 milyard dollar təşkil edəcəyi gözlənilir.

Hazırda “Starlink” şəbəkəsi dünyanın 160-dan çox ölkə və ərazisində fəaliyyət göstərir və 10 milyondan artıq aktiv istifadəçiyə yüksəksürətli internet xidməti təqdim edir.