Rusiyada Dövlət Dumasına seçkinin exit-poll nəticələri açıqlanıb

Rusiyada Dövlət Dumasına üç günlük seçki başa çatıb.Bu barədə "RİA Novosti" xəbər verir.

Ümumrusiya İctimai Rəyin Öyrənilməsi Mərkəzinin (VTSİOM) keçirdiyi “exit-poll”un nəticələrinə əsasən, hakim “Vahid Rusiya” partiyası 49,4 faiz səslə öndədir.

Rusiya Kommunist Partiyası 14,2 faiz, Liberal Demokrat Partiyası 10,7 faiz, “Yeni İnsanlar” 9,7 faiz, “Ədalətli Rusiya” isə 6,6 faiz səs toplayıb.

Exit-poll nəticələrinə görə, digər partiyalar Dövlət Dumasına seçkilərdə 5 faizlik seçki baryerini keçə bilməyib.

Rusiya Mərkəzi Seçki Komissiyasının ilkin məlumatına görə isə protokolların 13,88 faizi hesablandıqdan sonra “Vahid Rusiya” partiya siyahısı üzrə səslərin 57,54 faizini toplayıb.

Seçki məntəqələrinin bağlanmasına beş dəqiqə qalmış seçici fəallığı 56,66 faiz təşkil edib. Yekun seçici fəallığı göstəricisinin daha sonra açıqlanacağı bildirilib.

Rusiyada Dövlət Dumasına seçki sentyabrın 18-də başlayıb və səsvermə üç gün davam edib.