Ərdoğan vyetnamlı həmkarı ilə regional və qlobal məsələləri müzakirə edib

Türkiyə Prezidenti Rəcəb Tayyib Ərdoğan Nyu-Yorkda BMT-nin 81-ci Baş Assambleyası çərçivəsində Vyetnam Prezidenti To Lam ilə görüşüb.Bu barədə Türkiyə Prezident Administrasiyasının Kommunikasiya İdarəsi məlumat yayıb.

Görüşdə Türkiyə-Vyetnam ikitərəfli münasibətləri, eləcə də regional və qlobal məsələlər müzakirə olunub.

Ərdoğan iki ölkə arasında münasibətlərin strateji tərəfdaşlıq səviyyəsinə yüksəldilməsi təklifinə Vyetnamın müsbət cavab verməsindən məmnunluğunu ifadə edib.

O, Türkiyənin Vyetnamla investisiya, ticarət və müdafiə sənayesi başda olmaqla, müxtəlif sahələrdə əməkdaşlığın inkişaf etdirilməsi istiqamətində fəaliyyət göstərdiyini bildirib.

Türkiyə Prezidenti iki ölkənin beynəlxalq platformalarda əməkdaşlığı davam etdirməsinin vacibliyini vurğulayıb.

Ərdoğan, həmçinin Vyetnam Prezidenti seçilməsi münasibətilə To Lamı təbrik edib və onu Türkiyədə keçiriləcək BMT-nin İqlim Dəyişikliyi üzrə Çərçivə Konvensiyasının 31-ci Tərəflər Konfransının (COP31) Liderlər Sammitinə dəvət edib.