Qazaxıstanda matəm elan edilib

Qazaxıstanda Manqistau vilayətində xidməti vəzifələrini yerinə yetirərkən həlak olan hərbçilərlə əlaqədar sentyabrın 25-i ümummilli matəm günü elan edilib.

Anews.az Akordaya istinadən xəbər verir ki, bununla bağlı sərəncamı Qazaxıstan Prezidenti Kasım-Jomart Tokayev imzalayıb.

Matəm Xəzər dənizinin sahilində təlim-döyüş tapşırığını yerinə yetirərkən hərbi qulluqçuların həlak olması ilə əlaqədar elan edilib.

Qazaxıstan Müdafiə Nazirliyinin ilkin məlumatına görə, sentyabrın 24-də Manqistau vilayətində təlimlər zamanı hava şəraitinin kəskin pisləşməsi nəticəsində 19 hərbi qulluqçunu dənizdə axın aparıb. Onlardan 9-u həlak olub, üçü xilas edilib. Xilas edilənlərdən biri xəstəxanaya yerləşdirilib.

Hadisənin səbəblərinin araşdırılması üçün Baş nazirin müavini Kanat Bozumbayevin rəhbərliyi ilə hökumət komissiyası yaradılıb.

Komissiyaya hadisənin səbəblərini hərtərəfli araşdırmaq və həlak olan hərbçilərin ailələrinə yardım göstərmək tapşırılıb.