3 yaşlı qız üçün 15,3 min manat: Pakistanda ata onu 60 yaşlı kişiyə ərə vermək istəyib

Pakistanda üç yaşlı qızın 60 yaşlı kişiyə 2,5 milyon Pakistan rupisinə (təxminən 15,3 min manat) ərə verilməsi ilə bağlı qızın atası saxlanılıb, 60 yaşlı kişi isə axtarışa verilib. Bu barədə ölkə mətbuatı yazıb. 

Hadisə ölkənin Bəlucistan əyalətinin Çaman şəhərində baş verib. Polis məlumatına görə, qızın atası Əbdül Baqi qızının Salah Uddin adlı 60 yaşlı şəxslə evləndirilməsi barədə razılaşma əldə edib. Lakin polis müdaxilə edən zaman razılaşdırılmış 2,5 milyon Pakistan rupisi (təxminən 15,3 min manat) məbləğində ödəniş tam həyata keçirilmədiyi üçün nikahın baş tutmadığı bildirilib.

Polis Baqini saxlayıb, Uddinin isə axtarışda olduğunu açıqlayıb. Üç yaşlı qız və anası polis mühafizəsinə götürülüb.

Hadisənin “valvar” adlanan ənənə ilə əlaqəli olduğu bildirilir. Bu adət çərçivəsində bəy və ya onun ailəsi gəlinin ailəsinə pul ödəyir.

İstintaq zamanı ailədə daha əvvəl baş vermiş hadisə də araşdırmaya daxil edilib. Polis bildirir ki, Baqinin 13 yaşlı qızı Şükriyə Bibi bundan əvvəl Salah Uddinin oğlu Kamranla 1,5 milyon Pakistan rupisinə evləndirilib. Şükriyə təxminən iki həftə əvvəl Quetta yaxınlığındakı Kuçlakda ölüb. Onun həyat yoldaşı Kamran qətli törətməkdə şübhəli bilinərək saxlanılıb.

Polis ailələr arasında yaranmış mübahisənin Şükriyə Bibinin ölümü ilə əlaqəsinin olub-olmadığını da araşdırır.

 Bəlucistanda 2025-ci ildə qüvvəyə minmiş Uşaq nikahlarının qarşısının alınması haqqında qanun nikah üçün minimum yaşı 18 müəyyən edir. Qanuna əsasən, yetkin şəxsin uşaqla nikaha daxil olması cinayət hesab olunur və bununla bağlı həbs və cərimə cəzaları nəzərdə tutulur.

UNICEF-in məlumatlarına görə, Pakistanda təxminən 20,5 milyon qadın və qız 18 yaşına çatmadan evləndirilib, onların təxminən 5 milyonu isə 15 yaşından əvvəl nikaha daxil olub.

Gülnar Nazimqızı