Tailandda güclü yağış və daşqınlar 23 nəfərin həyatına son qoyub

Tailandda sentyabrın 16-dan davam edən leysan yağışlarının səbəb olduğu daşqınlar nəticəsində 23 nəfər ölüb.

“The Nation” qəzetinin Tailandın Fövqəladə Halların Qarşısının Alınması və Nəticələrinin Aradan Qaldırılması Departamentinə (DDPM) istinadən verdiyi məlumata görə, daşqınlar Banqkok da daxil olmaqla 29 əyalətdə 2,6 milyondan çox insana təsir edib.

DDPM-in məlumatına əsasən, 940 mindən çox təsərrüfat daşqınlardan zərər çəkib. Hakimiyyət orqanları zərərçəkənlərin təxliyəsini davam etdirir və müvəqqəti yerləşdirmə mərkəzləri fəaliyyət göstərir. Banqkokda 233 müvəqqəti sığınacaq yaradılıb.

Meteoroloqlar yağıntıların ümumilikdə azalacağını proqnozlaşdırırlar. Bununla belə, ölkənin bəzi bölgələrində güclü yağış, qəfil daşqın və torpaq sürüşməsi təhlükəsinin davam etdiyi bildirilir.