Kirayə mənzil mexanizmi üzrə müraciətlərin qəbulu müvəqqəti dayandırılır

Azərbaycanda satmaq öhdəliyi ilə kirayə mənzil mexanizmi üzrə yeni müraciətlərin qəbulu oktyabrın 6-dan etibarən müvəqqəti dayandırılacaq.Bu barədə İpoteka və Kredit Zəmanət Fondu məlumat yayıb.

Bildirilib ki, müraciətlərin qəbulunun bərpa ediləcəyi tarix barədə əlavə məlumat veriləcək.

Fondun məlumatına görə, fasilə artan müraciətlərin daha operativ qəbulu, şəffaf emalı və qiymətləndirilməsi, ərizəçilərə müəyyən edilmiş günlərdə mənzil seçimi imkanı yaradılması və elektron sistemin funksionallığının təkmilləşdirilməsi məqsədi daşıyır.

Qeyd olunub ki, 2020-2026-cı illərdə Bakı və Sumqayıt şəhərləri, eləcə də Abşeron rayonunda 17 ünvanda yerləşən yaşayış komplekslərində tam təmirli mənzillər vətəndaşlara təqdim edilib. İndiyədək mexanizm çərçivəsində 10 mindən çox kirayə müqaviləsi rəsmiləşdirilib.

Fond bildirib ki, son dövrlər mexanizmdən yararlanmaq istəyən vətəndaşların sayı əhəmiyyətli dərəcədə artıb. “Elektron ipoteka və kredit zəmanət” sistemi üzərindən hər gün 100-dən çox müraciət qeydə alınır.

Nəticədə sistemdə qeydiyyata alınan və görüş vaxtı təyin olunan müraciətlərin sayı seçim üçün mövcud yaşayış sahələrinin sayını dəfələrlə üstələyib.

Müraciətlərin müvəqqəti dayandırılması həmin tarixədək elektron sistemdə qeydiyyata alınmış müraciətlərə, onların növbəliliyinə və bu müraciətlər üzrə aparılan prosedurlara təsir etməyəcək.

Fondun məlumatına görə, indiyədək müraciət etmiş 12 mindən çox vətəndaşın şəxsi kabinetinə görüş günü ilə bağlı bildiriş göndərilib. Həmin şəxslər bildirişdə göstərilən tarixdə 2 saylı ASAN Kommunal və ya Sumqayıt ASAN Xidmət mərkəzlərinə müraciətlərini rəsmiləşdirmək üçün yaxınlaşa bilərlər.