ÜST Rusiyada laboratoriya əməkdaşının ölümünü izləyir

Ümumdünya Səhiyyə Təşkilatı (ÜST) Rusiyanın İrkutsk vilayətində taun üzrə tədqiqat aparan laboratoriyanın əməkdaşının ölümünü yaxından izləyir. Bunu ÜST-nin sözçüsü Kristian Lindmayer Cenevrədə keçirdiyi brifinqdə bildirib.

Onun sözlərinə görə, qadın oktyabrın 2-də ağır pnevmoniya nəticəsində ölüb, lakin ölümün səbəbi hələ rəsmi olaraq müəyyən edilməyib.

Lindmayer bildirib ki, Rusiya hakimiyyəti ÜST-nin məlumat sorğusuna cavab verib. Onun sözlərinə görə, Rusiyanın İrkutsk Elmi-Tədqiqat Taun Əleyhinə İnstitutunun əməkdaşında icma mənşəli pnevmoniya aşkarlandıqdan sonra epidemioloji araşdırma aparılıb.

ÜST sözçüsü qeyd edib ki, Rusiya hakimiyyəti hadisə ilə təmasda olan şəxsləri müəyyənləşdirərək onların vəziyyətini izləyir. Hazırda həmin şəxslər arasında xəstəlik əlamətlərinin yayıldığına dair məlumat yoxdur.

Rusiya səhiyyə qurumları isə ölümün pnevmonik taunla əlaqəli olub-olmadığını araşdırır. Hazırda taun infeksiyası rəsmi olaraq təsdiqlənməyib.