Suriyadan 13 nəfər Azərbaycana repatriasiya edilib

Azərbaycan hökumətinin həyata keçirdiyi tədbirlər nəticəsində Suriyadan 13 Azərbaycan vətəndaşı ölkəyə repatriasiya edilib.

Azərbaycan Xarici İşlər Nazirliyinin məlumatına görə, repatriasiya edilənlərdən altısı qadın, yeddisi isə uşaqdır.

Məlumata görə, repatriantların yeri, şəxsiyyəti və Azərbaycan vətəndaşlığı müəyyənləşdirilib, həmçinin onların ilkin tibbi və psixoloji müayinəsi aparılıb.

Azərbaycanın Suriya və Türkiyədəki səfirlikləri, eləcə də İstanbulda Baş Konsulluğu tərəfindən aparılan koordinasiya nəticəsində vətəndaşlar qayıdış şəhadətnamələri və təyyarə biletləri ilə təmin edilərək Azərbaycana gətiriliblər.

Repatriantların sosial reabilitasiyası və cəmiyyətə reinteqrasiyası üçün müvafiq tədbirlərin görülməsi nəzərdə tutulur.

Azərbaycan hökuməti xarici ölkələrdə silahlı münaqişələrin qurbanına çevrilmiş vətəndaşların repatriasiyası ilə bağlı tədbirləri davam etdirəcəyini bildirib.