Braziliyada uşaq bağçasında 13 nəfəri girov götürən silahlı şəxs öldürülüb

Braziliyanın Parana ştatının Kuritiba şəhərində polis üç saat ərzində 13 uşağı girov saxlayan silahlı şəxsi zərərsizləşdirib.Bu barədə UOL portalı xəbər verir.

Hadisə oktyabrın 9-da San-Braz rayonundakı bələdiyyə uşaq bağçasında baş verib.

Məlumata görə, kişi hasardan aşaraq müəssisəyə daxil olub və 4-5 yaşlı uşaqların olduğu otaqlardan birində barrikada qurub. Digər uşaqlar əməkdaşlar tərəfindən təxliyə edilib.

Hücum edən şəxsin bıçaq, tapança maketi və yanar maye daşıdığı bildirilir. O, otağı yandıracağı ilə hədələyib.

Parana ştatının hərbi polisinin məlumatına görə, təxminən üç saat davam edən danışıqlardan sonra xüsusi təyinatlılar müdaxilə ediblər. Hücum edən şəxs uşaqlardan birinə tərəf hərəkət edərkən polis tərəfindən öldürülüb.

Girov götürülən 13 uşağın hamısı xilas edilib. Onlardan beşi tibbi müayinə üçün xəstəxanaya aparılıb. Uşaqlardan birinin üz nahiyəsindən xəsarət aldığı bildirilir.

Hadisə zamanı digər uşaqların təxliyə edilməsi təhlükənin genişlənməsinin qarşısını alıb. Müəssisənin əməkdaşlarına, uşaqlara və onların ailələrinə psixoloji dəstək göstərilməsi nəzərdə tutulur.

Polisin məlumatına görə, ilkin araşdırma zamanı hücum edən şəxsin şizofreniyadan əziyyət çəkdiyi müəyyən edilib. Hadisənin motivləri araşdırılır.