Türkiyədə siqaret satışında şəxsiyyət vəsiqəsi tələb olunacaq

Türkiyədə siqaret satışına şəxsiyyət vəsiqəsi yoxlamasının tətbiqi nəzərdə tutulur.

“TRT Haber” xəbər verir ki, bunu Türkiyənin səhiyyə naziri Kemal Memişoğlu bildirib.

Nazir son dövrlərdə ölkədə tütün istifadəsinin artdığını qeyd edib.

Onun sözlərinə görə, Türkiyədə ölüm hallarının təxminən 60 faizinə səbəb olan xəstəliklərin əsas risk amillərindən biri tütün istifadəsidir. Memişoğlu ölkə əhalisinin təxminən 33 faizinin, yəni hər üç nəfərdən birinin tütün istifadə etdiyini bildirib.

Nazir, həmçinin Türkiyənin siqaret istifadəsinin səviyyəsinə görə dünyada ikinci yerdə olduğunu iddia edib.

Memişoğlunun sözlərinə görə, bununla bağlı qanun layihəsinin bir neçə həftə ərzində Türkiyə Böyük Millət Məclisinə təqdim edilməsi planlaşdırılır.