Kirayə mənzil mexanizminin qaydaları dəyişib: öhdəliyin ötürülməsinə yeni şərtlər tətbiq olunur

Azərbaycanda satmaq öhdəliyi ilə kirayə mənzil mexanizmindən istifadə qaydaları oktyabrın 1-dən dəyişib. Yeni qaydalara əsasən, kirayəçi müqavilə bağlandıqdan üç il sonra öhdəliyini başqa şəxsə ötürə biləcək, öhdəliyini ötürən şəxs isə mexanizmdən beş il sonra yenidən yararlana biləcək.

Bu barədə İpoteka və Kredit Zəmanət Fondu məlumat yayıb.

Dəyişikliklər kirayə mənzil mexanizminin daha əlçatan olması, şəffaflığın artırılması və sui-istifadə hallarının qarşısının alınması məqsədi daşıyır.

Yeni qaydalara görə, müraciət zamanı Fondun vəsaiti hesabına verilmiş aktiv ipoteka krediti olmayan borcalanlar da satmaq öhdəliyi ilə kirayə mexanizmindən yararlana biləcəklər.

Bundan başqa, mexanizmdən istifadə etmək istəyən şəxslərin kredit tarixçəsi qiymətləndiriləcək. Yalnız kredit tarixçəsi “müsbət” və ya “qənaətbəxş” hesab olunan şəxslər kirayə mənzil əldə edə biləcəklər.

Fond dəyişikliklərlə bağlı əlavə sualları olan vətəndaşların 1549 Çağrı Mərkəzinə müraciət edə biləcəyini bildirib.

Prezident İlham Əliyevin 25 yanvar 2019-cu il tarixli fərmanına əsasən tətbiq edilən mexanizm şəxsi yığımları mənzil almaq üçün kifayət etməyən vətəndaşların mənzil şəraitinin yaxşılaşdırılmasına yönəlib.

Fondun məlumatına görə, 2020–2026-cı illərdə Bakı və Sumqayıt şəhərlərində, eləcə də Abşeron rayonunda 17 müxtəlif ünvanda yerləşən yaşayış komplekslərində tam təmirli mənzillər vətəndaşlara təqdim edilib. İndiyədək mexanizm çərçivəsində 10 mindən çox kirayə müqaviləsi rəsmiləşdirilib.