Ruslar Avropanı qorxuya saldı

Polşanın müdafiə naziri Tomaş Simonyak Rusiyanın son vaxtlar Baltik dənizində hərbi fəallığının artmasından narahat olduğunu, lakin heç bir hücum təhlükəsinin gözlənilmədiyini söyləyib.

ANN.Az ANS PRESS-ə istinadən xəbər verir ki, Rusiyanın Baltik dənizində fəallığının artması bir sıra Şərqi Avropa ölkələrində narahatlıq doğurur.

Polşalı nazir deyib ki, bir neçə gündür Rusiyanın Baltik donanmasından Baltik dənizi üzərinə uçuşlar artıb. Bizi hələlik heç bir hücum təhlükəsi gözləmir. Bu fəallıq növbəti hücum hazırlığı xarakteri daşımır.

Hollandiya F-16 qırıcıları dekabrın 8-də Baltik dənizi üzərində 30 Rusiya hərbi təyyarəsi, həmçinin 2 bombardman təyyarəsi aşkarlayıblar. Bundan 1 gün sonra isə Norveç ordusu Rusiya qırıcı təyyarələrindən birinin Norveç təyyarəsinin yanından keçdiyini açıqlayıb. Bu ilin martında Rusiyanın Krımı ilhaqından sonra Polşa, Estoniya, Litva, Latviya kimi Baltik ölkələri gərginlik içində yaşayır.

Xatırladaq ki, Ukraynada münaqişənin başladığı səkkiz ayda 4300 nəfər ölüb, milyonlarla insan didərgin düşüb. Şərqi Avropa ölkələrini arxayın etmək üçün NATO bölgəyə daha çox hərbi gəmi və heyət göndərib.

ANN.Az