Kralın maaşı azaldıldı

Parlamentli monarxiya ilə idarə olunan İspaniyada Kral VI Flippın maaşı 20 faiz azaldılıb.

ANN.Az xarici ölkə mediasına istinadən xəbər verir ki, bu barədə kral sarayının rəsmi internet səhifəsində məlumat yerləşdirilib. Açıqlamada Kral VI Flippin maaşının 2014-cü ilə nisbətən 2015-ci ildə 20 faiz azaldılacağı və onun illik 234 min 204 avro alacağı bildirilib. Kralın arvadı kraliça Letizia 128 min 808 avro, "kral" ailəsinə daxil olan atası Xuan Karlos 187 min 356 avro, anası kraliça Sofia 105 min 396 avro alacaq.

İspaniyadakı yüksək qurumların təmsilçiləri və digər ölkələrdəki dövlət başqanlarının aldıqları maaşları nəzərə alınmaqla kralın aylıq məvacibi aşağı salınıb.

İqtisadi böhranla mübarizə aparan İspaniyada ilk dəfə 2009-cu ildə Kral Xuan Karlos və digər kraliyyət üzvlərinin maaşları dondurulmuş, son illər isə kral sarayının büdcəsi azaldılıb.

Qeyd edək ki, kral VI Flippin bacısı şahzadə Kristina və onun həyat yoldaşı Palma hersoqu Urdanqarin barəsində korrupsiya faktı ilə cinayət işi açılıb.

ANN.Az