Kseniya Sobçak Rusiyanı tərk etdi

Putinin köməkçisi məlumatları absurd adlandırır.

Məşhur teleaparıcı Kseniya Sobçak xüsusi xidmət orqanlarının tövsiyəsi əsasında Rusiyanı tərk edib.

Oxu.Az xəbər verir ki, bu barədə "Kommersant” məlumat yayıb.

Qəzetin məlumatına görə, martın 13-də Sobçak "ÇDL” restoranında rəhbərlik etdiyi L'Officiel jurnalının yeni nömrəsinin çıxması ilə əlaqədar ziyafət verib.

"Millətlər teatrında "Jenitba” tamaşasının premyerasını və bu ziyafəti ləğv edə bilmədim, lakin sabah Rusiyanı bir müddətlik tərk edəcəyəm”, - deyə, qəzet onun sözlərindən sitat gətirir.

Teleaparıcının yaxın dostlarının sözlərinə görə, "güllələnmə siyahısı”nda adı olduğu deyilən Sobçak xüsusi xidmət orqanlarının tövsiyyəsi ilə ölkəni tərk edib.

Bundan əvvəl bildirilirdi ki, Sobçak "güllələnmə siyahısı” haqqında məlumatın yayılmasından sonra öz mühafizəsini gücləndirib.

Siyahıda ondan başqa "Exo Moskvı” radiosunun rəhbəri Aleksey Venediktov və Rusiyanı tərk etmiş Mixail Xodorkovski də var.

Rusiya prezidenti Vladimir Putinin mətbuat katibi Dmitri Peskov isə "güllələnmə siyahısının” olması barədə məlumatları absurd adlandırıb.