ABŞ etirazını bildirdi

ABŞ Məhəmməd Mursi barədə ölüm hökmündən narahatdır

ABŞ Misirin sabiq prezidenti Məhəmməd Mursi və 2011-ci ildə həbsdən kütləvi qaçışlara görə cavabdeh hesab edilən digər 100-dən çox müttəhim haqqında ölüm hökmü çıxarılmasını ciddi narahatlıqla qarşıladığını bildirib.

ANS PRESS-in məlumatına görə, bu barədə rəsmi Vaşinqtonun mövqeyini Dövlət departamenti bildirib.

"Biz dəfələrlə kütləvi məhkəmə proseslərinin və hökmlərin əleyhinə çıxış etmişik, çünki bu addımlar Misirin beynəlxalq öhdəlikləri və qanunun aliliyi ilə ziddiyyət təşkil edir" - deyə Dövlət Departamentinin bugünkü bəyanatında deyilir.

Bu arada ölüm hökmü ilə əlaqədar narahatlığını Avropa Birliyi də gizlətməyib. Türkiyə prezidenti Rəcəb Tayyip Ərdoğan isə hökmü "keçmiş rejimin (Mübarək dövrü) davamı” kimi qiymətləndirib.

Qeyd edək ki, ölüm hökmü dünən Qahirə məhkəməsində çıxarılıb. Mursinin vəkili ölüm hökmündən apellyasiya şikayəti veriləcəyini bildirib. Sabiq prezident həmçinin casusluq ittihamları ilə üzləşir.