“Ölkədə qan töküləcək” - Elif Şəfəq

ANS PRESS-in məlumatına görə, türk əsilli romançı Elif Şəfəq "Financial Times”da dərc edilən yazısında Xalqların Demokratiya Partiyasının (HDP) iyunun 7-də keçiriləcək parlament seçkisində 10%-dən çox səs yığmayacağı halda, ölkədə qan töküləcəyini bildirib. 

Türkiyənin silahlı qarşıdurmaların baş verdiyi günlərin geri qayıda biləcəyini proqnoz verən məşhur yazıçı "Kürdlərin sürpriz hədiyyəsi Türkiyədə birlik ola bilər” başlıqlı yazısında Abdullah Öcalanı kürd xalq hərəkatının atası adlandırıb.

"HDP 10%-li səs toplamasa, kürdlər məclisdə təmsil edilməsə, bu, çox pis nəticələrə yol açacaq” – deyə o, məqaləsində bildirib.

Xatırladaq ki, bu il iyunun 7-də Türkiyədə parlament seçkisi keçiriləcək və ölkənin 4 partiyası – hakim Ədalət və İnkişaf Partiyası (AKP), müxalifətdə olan Cümhuriyyət Xalq Partiyası (CHP), Milliyətçi Hərəkat Partiyası (MHP) və separatçı kürdlərin Xalqların Demokratiya Partiyası (HDP) bu seçkiyə çox ciddi hazırlaşır. Seçkidə ümumi olaraq 20-yə yaxın partiyanın iştirak edəcəyi gözlənilir.