Rusiyanın müharibədə iştirakı Google Maps vasitəsilə "sübut olunur"

Vaşinqtonda mənzillənən "Atlantika şurası" adlı analitik mərkəzin dərc etdiyi hesabata əsasən, Rusiya ordusunun Ukraynanın şərqində baş verən münaqişədə iştirakına dair "təkzibolunmaz sübutlar" mövcuddur.

Təhlilçilərin iddia etdiyinə görə, həmin sübutlar internetdə açıq surətdə əldə edilə bilən Google xəritə xidmətinin məlumatlarına əsaslanır.

Rusiya, qoşunlarının Donbassda yerləşdiyini və hərbi əməliyyatlarda iştirak etdiyini inkar edir. Rusiyanın iddiasına görə, Ukraynanın şərqində yalnız könüllülər vuruşur.

Atlantika şurasının işçi qrupu isə Rusiya qoşunlarının hərbi əməliyyatlarda iştirakını açıq mənbələrə əsaslanaraq sübut etməyə çalışıb. İşçi qrupun tərkibi ABŞ-ın Kiyevdəki keçmiş səfiri John Herbst də daxil bir neçə ekspertdən ibarətdir. Rusiya rəsmiləri Atlantika şurasının yeni hesabatına münasibət bildirməyiblər.

Hesabatda qeyd olunduğu kimi, peyklərdən çəkilmiş foto materiallar, mərmi çalaların təhlili və açıq mənbələrdən götürülmüş məlumatlar "DXR" və "LXR" tərəfindən keçirilmiş irimiqyaslı hücumların Rusiya ərazisindən başlandığını sübut edir.

Atlantika şurası ekspertlərinin qeyd etdiyi kimi, Google Earth və Google Maps xidmətlərinə çıxışı olan hər kəsə Ukrayna sərhədinə bitişik ərazilərdə Rusiyanın şəbəkələşmiş sistemlər yaratdığı aydın görünür. // bbc.com/azeri