“Bizi narahat edən məsələ Rusiyanın Azərbaycana hücum silahları satmasıdır”

"Bizi narahat edən məsələ Rusiyanın Azərbaycana hücum silahlarını satmasıdır”.

APA-nın məlumatına görə, bunu Rusiyanın "Eksport voorujeniy” jurnalına müsahibəsində Ermənistan müdafiə nazirinin müavini, general-leytenant Alik Mirzabekyan deyib.

Onun sözlərinə görə, hücum vəzifəsini həll etməyə kömək edəcək silahlar məqsədyönlü şəkildə satılıb. "Söhbət də məhz bundan gedir. S-300 sistemlərinə gəldikdə isə heç kim bundan danışmır. Bəli, biz başa düşürük ki, onlar (Rusiya-red.) Avropada adi silahlar haqqında Müqavilədən çıxıblar. Bu, bizi çox ciddi narahat edir. Bu məsələdə bilavasitə silah satışı faktı yox, məhz satılan konkret silah növləri bizi narahat edir”.

A. Mirzabekyan qeyd edib ki, Rusiya Azərbaycana "Smerç” reaktiv atəş sistemləri, TOS-1A ağır alov saçan sistem, T-90 tankları, MTU-90 tank körpüsalan və digər silah növlərini satıb. Onun sözlərinə görə, bütün bunlar təkcə hücum yox, həm də seçmə silahlardır.  

"Hücum və əks-hücum əməliyyatları anlayışı var. Əsas operativ vəzifə müdafiə sədlərini yarmaqdır. Rusiyanın Azərbaycana satdığı silah isə buna tam uyğundur”, - deyə o vurğulayıb.

 
www.ann.az