İŞİD qadınlara görə 24 saat vaxt verdi

Terrorçuların bu dəfəki tələbi Misir həbsxanalarındakı qadınların azadlığa buraxılmasıdır.

İŞİD terror qruplaşması Xorvatiya vətəndaşını girov götürüb.

ANS PRESS-in məlumatına görə, silahlıların bu dəfəki tələbi Misir həbsxanalarında saxlanılan müsəlman qadınların azadlığa buraxılmasıdır. Silahlılar rəhbərliyin tələbləri icra etməsi üçün onlara 48 saat vaxt verib. Əks halda, girovun öldürüləcəyini bildiriblər.

30 yaşlı Tomislav Salopekin silahlıların əlində girov olması faktı Xorvatiya hökuməti tərəfindən də təsdiqlənib. Rəsmilər bildiriblər ki, o, Misirin paytaxtı Qahirədə işə gedən zaman silahlıların əlinə girov düşüb. Salopekin Fransaya məxsus neft-qaz şirkətinin əməkdaşıdır.

İŞİD-dən daha bir təhdid Almaniya kansleri Angela Merkelə qarşı gəlib. Silahlılar videorolik vasitəsi ilə Merkelə və Almaniyadakı tərəfdaşlarına ismarış göndəriblər.

Alman dilində danışan silahlılar bildiriblər ki, Almaniya anti-İŞİD koalisiyasına qoşulduğu üçün onlar Berlindən qisas alacaqlar.

Silahlılar, eyni zamanda, Əfqanıstanda müsəlmanların öldürülməsinə görə Almaniyanı cəzalandıracaqlarını bildiriblər. Silahlılar alman "qardaş və bacıları”nı Suriya və İraqda onlara qoşulmağa və ya öz ölkəsində inancsız insanlara qarşı hücumlar etməyə çağırıblar.